بحب الكليه ,, عشان !!

بحب الكليه !
عشان .. الصحيان بتاع الصبح بدرى ! وااكتشاف الحب الكبير اللى بينى وبين السرير ! (بسيبه بالعافيه ! )

عشان .. مشوارى الصبح الملىء بالمناظر الطبيعيه (حديقه الاندلس  والغابه ! ) والدخول من بوابه الجامعه والاستمتاع زمان بخناقه مع بتوع الامن , لكن دلوقتى اصبحو نساء (فخر واعتزاز بكل نساء مصر. بدونكن لن ينهض الوطن ! ) , اتامل فى منظر الشمس وهى خلفى , واتامل فى منظر السياح (طلاب من خارج المدينه ! ) فى طريق الجامعه يتماشون ويتصورون جنب النافوره ! , واحول ما احمله من الكتف اليمين الى الكتف الشمال مثل مسطره حرف T (هندسه بقى ! ) , او حقيبه اللاب (منظره ! ) او الكشكول (منظره برده ! ) ساعات بختصر الكلام دا ! واروح بتاكسى او بعربيه !

عشان .. تحول المصطلحات فى الكليه من مستر الى دكتور , ومدير الى عميد , وكتب دراسية الى كتب دكاتره ,, والكتب الخارجيه الى مرجع خارجى ! 

عشان هاطلع فاهم وعشان كدا على طول كنت بسمع فهمى نظمى عظمى !

عشان عندنا ورش ومعامل (معامله اطفال ! ) 

عشان ..لما عم الدكتور يعدى ,, كله يخبى موبليه يخبى !

عشان .. عندنا اتحاد طلبه دايما بيعمل دورات ,, دورات تدريبه او دورات كوره !
عشان ..لما بنيجى ندور على مدرج كاننا بندور على شقه مفروشه ! وبنختار بقى اللوازم اللى هتريحنا فيها زى البروجكتور ونوع خشب المدرجات و ارتفاع السبوره وقلم ويكون مفيهاش تراب ! (ابعد عن مدرجات الدور التالت ! )
عشان .. الساعات المعتمده وهو النظام الذى تختار فيه كل شىء , يعنى مالكشى انك تختار لا ماده ولا دكتور ولا جدول دراسه ولا جدول امتحانات و لامرشد اكاديمى , مالكشى غير ربنا ,, أمين ؟! 
عشان ...الاداره (الدواره ! ) وهى عباره عن داااايره كبيره , تفضل تلف فيها كتير (تلف تلف تلف ! ) عشان تخلص الورقه اللى عايز تخلصها !
عشان .. الحمامات ,, حقيقى الحمامات ناقصها حاجات غير اساسيه ( زى المرايات , والعطور , وسائل تنظيف  ومناديل) لكن ايضا هى ينقصها الحاجات الاساسيه ! (زى الحنفيات , المواسير , البلاعات , القواعد ! ) من الاخر هى ناقصه اصلا حمامات ! 

عشان .. النافورة وهى عباره انانبيب (غاز  ! ) معمومله بشكل جمالى ملتوى فى اتجهات مختلفة متبعثره !

عشان .. طلب من الاداره ! وهو يشبه طلب الصداقه ,, ويكون دائما الرد عليه بNot Now , Now Now ,, May Be later!

واكتر ناس بتشوف دا ( بتوع الاسر والاتحاد والخريجين ! وهما بيخلصو ورقهم ! )

عشان .. حاجات انا مش فاهمها وحولها علامه الاستفهام ! ( الاصانصير - المدرج اللى فوق المسرح - الكولدير - الراجل اللى قاعد على طول فى الشمس ! )
عشان .. القاعده اللى ورا الكليا !  ويتم تنصيف الشباب الى (واحد الحريم مسوَّحاه، و واحد المخدرات مسوحاه، و واحد المزيكا مسوحاه ، و واحد التكنولوجيا مسوحاه، و واحد بيسف عليهم كلهم ! ) عشان مانظلمشى الباقى , فى ناس بتروح ورا عشان طراوه !